Jer 12 | NdeIBE | STEP | Wena ulungile izikhathi zonke, O Jehova, lapho ngiletha indaba kuwe. Ikanti ngingakhuluma lawe ngokulunga kwakho: Kungani indlela yababi iphumelela na? Kungani abangathembekanga behlezi kuhle na?

Jeremiah 12

Insolo KaJeremiya

1 Wena ulungile izikhathi zonke, O Jehova, lapho ngiletha indaba kuwe. Ikanti ngingakhuluma lawe ngokulunga kwakho: Kungani indlela yababi iphumelela na? Kungani abangathembekanga behlezi kuhle na?

2 Ubahlanyele, njalo sebemilile; bayakhula bathele izithelo. Bahlezi bekhuluma ngawe, kodwa ezinhliziyweni zabo ukhatshana.

3 Kodwa mina, O Jehova, uyangazi; uyangibona uhlele imicabango yami ngawe. Bahudule njengezimvu eziyahlatshwa! Bamisele usuku lokubulawa!

4 Koze kube nini ilizwe lomile lotshani iganga lonke bubunile? Ngenxa yokuthi labo abahlala kulo babi, izinyamazana lezinyoni sezibhubhile. Kanti futhi abantu bathi, “Kasoze akubone okwenzakala kithi.”

Impendulo KaNkulunkulu

5 “Nxa ugijime labantu ngezinyawo bakudinisa, ungancintisana njani lamabhiza na? Uma ukhubeka elizweni elingelangozi, pho uzakwanelisa njani ezixukwini zaseJodani na?

6 Abafowenu, indlu yakwenu – labo futhi bakunikele; baklabalale batsho okubi ngawe. Ungabathembi, lanxa bekhuluma kuhle ngawe.

7 “Indlu yami ngizayitshiya, ngilidele ilifa lami; lowo engimthandayo ngizamnikela ezandleni zezitha zakhe.

8 Ilifa lami kimi selibe njengesilwane ehlathini. Liyangihwabhela; ngakho ngiyalizonda.

9 Ilifa lami kimi kaselibe njengenyoni emabalabala edla inyama ehanqwa ngezinye izinyoni ezidla inyama, ziyihlasela na? Hamba uyebutha zonke izinyamazana zeganga; uzilethe ukuba zidle.

10 Abelusi abanengi bazasichitha isivini sami bagandele insimu yami; bazaguqula insimu yami enhle ibe lugwadule oluphundlekileyo.

11 Izakwenziwa ugwadule, yome iphundlekile phambi kwami; ilizwe lonke lizachitheka ngoba kakho olinakayo.

12 Emiqolweni yonke engelalutho enkangala abachithi bazaphithizela, ngoba inkemba kaJehova izakudla kusukela komunye umkhawulo welizwe kusiya komunye; kakho ozavikeleka.

13 Bazahlanyela ingqoloyi kodwa bavune ameva; bazazidinisa kodwa bangazuzi lutho. Ngakho wobani lenhloni ngesivuno senu ngenxa yolaka olwesabekayo lukaJehova.”

14 UJehova uthi: “Bonke omakhelwane bami ababi abathumba ilifa engalinika abantu bami bako-Israyeli, ngizabasusa emazweni abo ngisuse lendlu kaJuda phakathi kwabo.

15 Kodwa emva kokubasusa kwami, ngizaphinda ngibe lesihawu ngibuyisele omunye lomunye wabo endaweni eyilifa lakhe elizweni lakhe.

16 Bangazifunda kuhle izindlela zabantu bami njalo bafunge ngebizo lami besithi, ‘Ngeqiniso elinjengoba uJehova ephila’ – lanxa nje bake bafundisa abantu bami ukufunga ngoBhali – bazahlaliswa phakathi kwabantu bami.

17 Kodwa uma isizwe singalaleli, ngizasisusa ngokupheleleyo ngisibhubhise,” kutsho uJehova.